Dear Adi ,

Finally aapki ek wish puri ki maine, hum dono k upar ek story likh kr. Haan I know ki aap chahte the ki mai ek romantic story likhti lekin ab kya karu , jo jo hua wo likha . I know ki maybe ye padhne k baad aapko mujh pr gussa aaye , jayaz bhi hoga. Lekin is story k through maine wo sab likh diya jo mai aapse nhi keh pa rhi thi. Kehti bhi kab, hum kahin jate to wahan bheed itni hoti thi, or jab kabhi kuch mauke bhi the tab mere paas words nhi the. Mai ye story aapko blame krne ya bura feel karane k liye nhi likh rhi Adi. Bas Jo cheez mere andar dabi hui thi wo batane k liye likh rhi. Mere Nazar me aapko le kr jo respect h wo kabhi kam nhi hogi. Lekin ye bhi sach h Adi ki aapne Mera Dil toda h. Haan Mai ye sab agar chat pr bolu to maybe aap mujhe chup Kara denge aapko ye lagega ki mai baaten badha rhi lekin sach kahun to agar aapne Shanti se baith pr kisi din meri complain sun li hoti , kisi din ye samjh liya hota ki mai kya chahti hoon aapse , kisi din 10 min ka time nikal kr mere nazariye se cheezon ko dekha hota to shayad ye sab itna badhta nhi. Mai aapko baar baar bolti rhi ki Adi Indian toxic household behaviour chor dijiye , wo behaviour jisme samne wale ko blame krna ho. Wo behaviour jisme cheezen sort krne ki jagah usko dba diya jata h. Wo behaviour jahan aap ye sochte ho ki raat ki arguments mai subah bhul kr aapke gale jau. Ya wo behaviour jahan aap meri baton ko bhi ignore kr k gussa dikhate h. Ya wo behaviour jab aap kisi bhi situation me mujhe akela chor dete h , Bina ye soche ki us situation ka mujh pr kya prabhav padega. Ek baar khud ye sochiyega Adi ki kya aap apni behen ya beti ko aisi situation me daloge ? Nhi. Kabhi nhi. But karma never leaves us Adi. Sach to ye h Adi ki aapne khud ki mujhe aapse dur kiya h. Itna dur kr diya h ki ab aapke jokes se awkward feel krne lagi hoon. Haan abhi bhi Mann hota h ki kabhi aapko jee bhar k dekhu lekin fir darr si jati hoon ki kahin fir se aapko pehchan nhi pai to. Abhi bhi Mann hota h Adi ki kisi din aapke gale lag kr batau aapko ki kaise aapne Mera Dil toda, lekin fir darr jati hoon Adi ki kahin safe lagne ki jagah unsafe feel hua to. Mann bahut hota h Adi ki aapke paas aau lekin fir lagta h ki aap pr mera koi adhikaar hi nhi h. Aapka naam , aap pr adhikar kuch nhi h mere paas . Aapko lagta hoga ki shayad Mai aapko force kar rhi ki kal ko apne parivaar se lad k aap mere paas aana, nhi Adi. Mai force nhi kr rhi. Kal ko shayad aap darr kr piche hat jaoge to aaj se 4 ya 5 saal baad mere papa dhoondh lenge kisi or ko. Mai bas life time ek situationship me atak kr nhi reh sakti Adi. Mai life time ek aise insaan k liye race nhi daud sakti Adi jo mere liye ek kadam chalne me bhi soche. Apne parivaar k samne mai nhi ghabrai Adi , aapko unke samne bhi pehla respect diya h maine. Ye jante hue ki mere parents sab notice karenge. Kyu ? Kyuki mere liye aapka Maan mayne rakhta h. Pr aap shayad darte h tab hi maybe aap kisi k samne mujhe accept nhi kr sakte. Aap apni mumma se meri baaten share nhi kr sakte. Even as a friend. Maybe ab aap ye kahoge ki Anushka tum bhi to apne papa se nhi keh sakti n , pr jitna keh pati hoon utna kehti hoon Adi. Mere papa se aap pehle din mile ho exam time , tab unka reaction dekha hoga aapne. Or ab jab aap ghar aate h to wo aapse ache se baat krte h , kyu ? Coz I made your image in their sight. Adi , mai koi time paas wali ladki nhi hoon, jo aapne suvidha or gifts k liye aapke sath hai or fir kal ko jab kaam ho gya to chal du. Mai aapke liye wait kr sakti hoon , lekin tab jab mere wapas uski thos wajah ho. Most importantly jaisa aapne mujhe pichle kuch mahino me treat Kiya h, mai waisa treat hona bilkul bhi deserve nhi krti. I deserve the best treatment. Pr mujhe wo aapse keh kr nhi chahiye. Sach kahun to ab mere andar itni takat nhi ki mai aapko paragraphs type kr k ye samjhau ki Adi pls treat me nicely. Nope. Mai aapko kyu batau ki aap high value man bano , jab shayad usse future me mujhe koi labh na ho. Aap kal keh rhe the n ki aap mere aarya hai, kya aap kabhi mere liye janeu pehn paoge ? Kal ko apne papa mumma ko convince kr lenge? Mai bas itna janti hoon n Adi ki aap chah jaoge to sab kr lenge , sab kuch.

Pata h Adi , mujhe ne ye talking phase wale bahut log mile h , wo log jo kahe ki give it a chance n all. Pr Maine bharosa kewal aapke pyaar pr Kiya. Lekin wo bharosa aapne Tod diya. Sach bolu to ab bharosa nhi mujhe pyaar pr. Pyaar ki bahut achi image thi mere mann me. Mujhe laga tha ki jab koi mujhse pyar karega to aisa hoga , aise treat karega lekin sab ulta hua. Shuru k kuch months chor k . Aap jo puchte ho n ki kabhi kuch nhi kiya , to nhi Adi aapne bahut kuch kiya h mere liye. Shuru me bahut pyaar diya h aapne. Mujhe lagta tha n ki mujhe kisi ne pyaar nhi kiya lekin aap sabke hisse ka sneh le kr aaye h mere liye. Mai kyu kehti hoon ki mujhe aapke me mummy papa dono dikhte h ? Kyuki mujhe aapme care , warmth or safety mehsoos hoti thi. Adi, awkward texts bahut log bhej denge , lekin respect or security sirf wahi de sakta h jo pyaar krta h. Agar mai aapke jeevan me ruk rhi hoon to mujhe ek jagah chahiye hogi Adi, mujhe aapki Shakti Banna h , aapke liye ek safe place Banna h , jab aap duniya se thak kr aao to aapka Ghar Banna h. Mai aapke liye koi struggle nhi Banna chahti. Pr wo tab tak possible nhi h jab tak I am treated rightly. Chaliye aapko aapke style ka hi example deti hoon , agar aapke papa Ghar paise na de to wo kya aapki mummy se umeed rakhenge ki jab wo ghar aaye to wo khana ready rakhe? Haan jab tak ho payega wo karengi , lekin fir ? Jab sab khatam ho jayega to ? Jab tak sahi treatment n ho , tab tak koi Shanti kaise de sakta h. Maine khud ko Khali kiya h aapke liye Adi. Khud ko chot pahucha kr aapko heal Kiya h maine. Aap ye kehte ho n Adi ki aapke papa aapki mummy ko kabhi flower nhi diye , pr fir bhi wo sath me khush h. Maheshwar kare ki wo khush ho lekin kya aap apni mummy k paas baith kr ye puche ho ki unhone apne kitne armaan maare honge just to adjust in your father's family. Ki unhone kitne disrespect sahe honge. Maybe mujhe bhi koi puche to mai yahi bolu ki haan mai Adi k sath bahut khush hoon lekin fir sach kya h , kab kab mai akele roi hoon , kab kab aapne dil toda h mera wo mujh tab hi rahega n Adi. Difference ye h ki aapki mummy k paas adhikaar h or mere paas nhi. Difference ye h ki aapki mumma k paas naam h pr mere paas nhi. Wo sath k kyuki wo bandhi hui h pr Mai kyu hoon Adi ? If this is not devotion then what else is ? Or kya aap apni behno k liye bhi aisi life chahoge Jahan wo kewal adjust kare, na ki sukh se rhe Khushi se. Ofc nhi. Mai aapko ye sab koi selfish motive se nhi pata rhi Adi bas bata rhi taki aap ek bete, ek bhai , ek pati or ek pita sabki drishti se soch pao ki aap apni life me reh rhi streeyon ko kaisa jeevan dena pasand karenge. Kal ko Mai na rahun to bhi.

Mai chahti hoon ki kal ko jab aap meri or dekho to aapko Shanti or Shakti mehsoos ho , or jab mai aapki or dekhu to mujhe rahat. Jab aap mere paas ho to aap calm rho or jab mai aapke paas rahun to safe rahun. Or ye tab tak sambhav nhi h jab tak aap khud n chaho. Aapko high value isiliye banne kehti hoon kyuki ek high value man hi ek high value woman ko maintain kr sakta h. Warna wo uski chamak hi khatam kr deta h. Look at Aishwarya and Abhishek. Aap high value honge to aapke naam se aapki maa , aapki behno sabka standard high hoga. Socho aapki behene kabhi kisi k liye royengi nhi coz unhe pata hoga ki unka bada bhai jab pyaar me itna kuch kr sakta h to koi or kyu nhi. Kal ko aap jisko bhi chune , wo lucky feel kare aapke liye. Aapke Karan roye n. Shayad hi koi or aapke prati nihswarth bhav se samarpit ho payega Adi. Koi hoga bhi to shyad kisi bandhan se , kisi naam ya keerti k liye. Pr fir bhi jiske liye bhi aap badlo badalna jaroor Adi. Aapki Khushi bahut matter krti h mujhe. Kal ko Mai kahin bhi hoon aap khush ho ye soch kr kuch hi rahungi. Shubham ko mai hate krti hoon Adi pr aapko kabhi nhi kr paungi. Or aapko ye lagta hoga ki mai nhi jaungi ab kahin to maybe ye sach nhi h Adi, ab or disrespect mai nhi seh paungi. Mujhe aapse awkward texts nhi chahiye, aapka sarcasm ya gussa nhi chahiye Adi. Gifts or paise nhi chahiye mujhe. Pyaar , respect or care chahiye. Mai ab or disrespect le kr khud ko maa baba se dur nhi kr sakti.

Haan ye sab padh kr maybe aapko mere upar bahut gussa aaye. I know bahut bol gai mai. Lekin jaroori tha. Jab tak ye sab clear nhi hoga tab tak koi nai shuruaat nhi ho payegi. Maybe aapko ye realise ho ki aapko mujhse pyaar nhi , ya fir ye bhi realise ho ki aapko ab mujhse baat nhi krni . Ya fir ye realise ho ki ab aapko actually change hona h. Jo kuch bhi ho Adi , just let me know clearly. Aapka fir Jo decision hoga mai accept karungi. Or is baar please sab clear batana mujhe. Kyuki ab mai jhoothe hopes k bharose reh or hurt nhi ho sakti hoon Adi. Aapne mere liye jo kuch bhi kiya I am very very grateful for that. Aapki ab bhi bahut izzat krti hoon mai. Lekin bas ab mai khud ko or khali nhi kr paungi Adi. Agar aap mere liye ek safe environment create karoge to haan mai aapke liye aapka Ghar ban jaungi. Warna nhi. Ek time pr mujhe sach me laga tha ki maa baba ne aapko mere liye bheja h. Haan sach me Mera Mann hota h ki kash aap pr khud ka tag laga pati. Ki aapke arms me chip kr ro leti dhang se. Aapko pata pati ki kitni jaroorat thi aapki jab aapne mujhe akela chor diya. Kitna tod diya tha aapne mujhe. Ek aisa bhi wakt tha jab shayad aapko mere aansu ki keemat nhi thi. Lekin ab or nhi Adi. Agar mai samarpit hoon to mujhe smarpan chahiye. Is baar please be clear. Tab hi rokna Adi , jab mere rukne ka koi arth ho. Agar aap Jana chaho ya mujhse baat band krna chaho it's fine. Bas bata dena mujhe. Aapke jawab ka intezar rahega Adi.

Aapki miss/ princess/ gudiya/ bachcha / betu